Wo Kehti hai Suno Jana Muhabbat Mom ka ghar hai,

wo kehti hai suno jana !!!
Muhabbat Mom ka ghar hai,

Tapish ye bad gumani ki,
Kahin Pighla na de isko,

Me kehta hun k jis dil me,
Zara bhi bad gumani ho,

Wahan kuch aur ho to ho,
Muhabbat ho nahi sakti,

Wo Kehti hai sada aisay hi,
Kiya tum mujh ko chahoge?

K me is main Kami bilkul,
Gawara kar nahi sakti,

Me kehta hoon,
Muhabbat Kiya hai ,

Ye tum ne sikhaya hai,
Mujhay tum se muhabbat ke,
Siwa kuch bhi nahi aata,

Wo kehti hai Judai se,
Bohat darta hai mera dil,

K khud ko tum se hat ker dekhna,
Mumkin nahi hai ab,

Me Kehta hun yahi khadshay,
Bohat Mujhko satatay hain,

Magar sach hai muhabbat me,
Judayi sath chalti hai,

Wo kehti hai batao kiya,
Mere Bin jee sako gay tum?

Meri Batain meri yadain,
Meri aankhen bhula do gay?

Me Kehta hun,
Kabhi is baat per socha nahi me ne,

Agar ik pal ko bhi sochun,
To sansain ruknay lagti hain,

Wo kehti hai tumhain muhj se,
Muhabbat is qadar kyun hai?

K me ik aam see larki,
Tumhain kyun khaas lagti hun,

Me kehta hun,
Kabhi Khud ko,

Meri aankhon se tum dekho,
Meri dewaangi kyun hai,

ye khud hi jaan jao gi,
Wo Kehti hai,

Mujhay waraftagi se dekhtay kyun ho?
K me khud ko,

Bohat hi keemti mehsoos karti hun,
Me kehta hun,

Mata-e-jaan Bohat anmol hoti hai,
Tumhain jab dekhta hun,

Zindagi mehsoos kerta hun,
Wo Kehti hai,

Mujhay Alfaaz k jugnoo nahi miltay,
Tumhain batla sakun dil me,

Mere kitni muhabbat hai,
Me Kehta hun Muhabbat to,

Nigahon se chalakti hai,
Tumhari khaamshi Mujh se,

Tumhari baat karti hai,
Wo kehti hai batao na,

Kisay khonay se dartay ho?
Batao Kon hai wo?

Jis ko ye mosam bulatay hain,
Me kehta hun,

Ye meri Shayiri hai,
Aayina dil ka,

Zara dekho batao kiya,
Tumhain is me nazar aaya?

Wo kehti hai k Atif jee !!
Bohat batain banatay ho,

Magar Sach hai k ye batain,
Bohat hi shaad rakhti hain,

Me kehta hun,
ye sab batain Fasanay,

Ik bahana hain,
k pal kuch zindgani k,

Tumharay saath kat jayen,
Phir is k baad khaamshi ka,

Dilkash Raqs hota hai,
Nigahain bolti hain,

Aur Lab khamosh rehtay hain…